01/06/2018

Ufaransa nchi ya mabwege ?


Hivi karibuni tumeshuhudia mkasa wa ajabu. Mkwezi kutoka Mali aliyekuwa ameingia Ufaransa kinyume na sheria ameonyeshwa kwenye runinga na mitandao ya kijamii huku akipanda kwa mikono mitupu ghorofa za jengo moja katika mtaa fulani huko Ufaransa. Alifanya vile kwa sababu ya mtoto mmoja aliyekuwa amejikuta ananing’inia penye ghorofa ya nne, nusura kuanguka chini kutoka roshani ya juu. Ndipo mkwezi huyo, kutokana na ushujaa wake, alipoamua kumwokoa mtoto huyo.

Tukio hilo hapa Afrika lisingeguswa, mbali na kushangiliwa, hata kidogo penye baraza za Waswahili wala mtu huyo asingepata sifa yoyote, kwa sababu moja kuu : Afrika wakwezi wako chungu nzima. Na wengi wana kupuu… Ndio maana hatuna budi kujiuliza, kwa nini jamaa huyo ametunukiwa kila kitu, hadi kupewa uraia (wengine wengi wameshasema kwamba atapata mke pia). Maana yake nini ?

Kwanza, msomaji ukiwa na mpango wa kukimbilia Uzunguni, shurti usiwe mtu mwenye akili nyingi, usiwe mtu ambaye umebobea katika taaluma za ndani, sijui usanii au sayansi. Hapana, ujasiri fulani utatosha. Msomaji usikonde, wewe pia unaweza ukafaulu : nenda kila siku penye klabu ukatunisha mishipa yako, ndipo huenda utakapopata nafasi ya kupata visa ya kuingia kwa Mamtoni. Kusoma ? Acha tu, kumepitwa na wakati. Wafaransa ni mabwege, hawajui lolote. Isitoshe, wanaacha watoto wao katika hali ya hatari. Katika nchi za Afrika zenye lugha ya kifaransa, mpaka leo hatuachi kucheka, mbavu zinawauma watu. Kejeli na dhihaka chungu nzima zinarushwa. Kama katuni hiyo ifuatayo :

Ufaransa : tayarisheni madokumenti, tuko njiani,
tunakuja !

Pili, huyo kijana mkwezi amepewa taadhima kubwa sana. Mpaka rais ya Ufaransa amemkaribisha ndani ya Ikulu, ambapo siku hizi ni kibanda cha mabwege wanaotawaliwa na Vizito vya Yuropa, si mnamfahamu mama Merekeli ambaye siku hizi anapiga mnada mkubwa sana ? Yeye ndiye aliyeanzisha biashara hiyo ya kuingiza katika nchi za Ulaya watumwa kutoka Afrika. Utumwa mpya lakini, si ule wa zamani. Siku hizi huo utumwa ni halali, hamna shida. Human righti, bwana ! Watumwa hawa wanatakiwa kuhitimu shahada yao ya kupiga domo-kasia ndani ya mashua ya kuvukia bahari ya Mediteranea. Wakishavuka bahari hiyo, pale ufukeni watawakuta wale mabwege wakiwasubiri na hundi, chakula na misaada mbalimbali. Hamdulilah !

Uhispania tayari kupokea "wahamaji"
"Poa, stroberi zetu zitachumwa"
Tatu, usiwe na taharuki kama hujapata kibali chako. Iko siku, utapata. Tufanye mambo kwa zamu na nidhamu. Utapata kwa sababu Ufaransa tayari ni nchi ya kiafrika. Na kama umesoma darasani kwamba Afrika ina nchi 54, ujisahihishe sasa, ziko 55, pamoja na Ufaransika. Hiyo ni dhahiri. Wacha nikufahamishe. Hapa Afrika mtu yeyote mgeni, awe msomi, mtu hodari sana katika taaluma au ujuzi fulani, ama, kwa mfano, awe na umahiri fulani katika kuimudu lugha mojawapo ya kiafrika, huku akionyesha kwamba anajua kimakonde au kiswahili kushinda hata mwenyeji, basi thubutu, kupata uraia haiwezekani. Huyo mgeni hatakiwi, kama alivyo mgeni msomi huko Ufaransa siku hizi, kunradhi Ufaransika. Na kweli ukichambua zaidi, mfano Tanzania, utagundua kwamba Mbanyani tu kutoka Kariakoo ndiye ambaye hupata uraia wa Tanzania, pengine kupitia hongo na ubani chungu nzima. Huyo ndiye mkwezi wa Tanzania.

                                   

Jamaani, msikonde, visa zitapatikana. Na kama mnataka kupeleka watoto wenu huko Juu, kwanza msisahau kwamba Ufaransa nako ni nchi yenye shule (za mabwege) huko kwenu. Mkazitafute basi, just in case unataka kujifunza maneno mawili matatu ya kifaransa… yatatosha hayo, si unajua Ikulu siku hizi, wanataka kuajiri mfua dafu !

Lakini mkitaka kupata vibali haraka haraka, msomaji unaweza kufululiza barabara ya Ali Hassan Mwinyi rodi mpaka utalikuta jengo la Ubalozi wa Ufaransa… lakini usijaribu kuchupia ukuta wake ! Usifanye haraka…

Picha hizo za chini zikionyesha jamaa wa nchi mbali mbali za Afrika magharibi wakiwa sasa wanafanya mazoezi huku wakijaribu kupanda majengo… just in case !


                                                 

Hakuna maoni:

Chapisha Maoni